Boqolaal kun oo qof oo laga yaabo in ay waayaan (Food Stamp & Wic) oo ay ku tiirsanaayeen haddii la sii wado xiritaanka dowladda

Saint Cloud, Minnesota — XIDIG TV

Boqolaal kun oo qof oo ku nool gudaha Mareykanka, gaar ahaan kuwa danyarta ah ee ku tiirsan barnaamijyada cunto-caawinta SNAP (Food Stamps) iyo WIC (Barnaamijka Haweenka, Dhallaanka iyo Carruurta), ayaa loo diray digniin rasmi ah in ay halis ugu jiraan in aysan helin deeqdooda bishan soo socota haddii la sii wado xiritaanka dowladda federaalka ee ka socda Washington DC.

Wasaaradda Beeraha ee Mareykanka (USDA) ayaa sheegtay in haddii aan la ansixin miisaaniyadda cusub, maalgelinta lagu bixiyo cuntada dadka saboolka ah ay go’i karto dhamaadka bisha Oktoobar, taas oo saameyn ku yeelan doonta in ka badan 42 milyan oo qof oo ka faa’iideysta SNAP guud ahaan dalka.

Minnesota iyo gobollada kale oo bilaabay digniino

Saraakiisha gobolka Minnesota ayaa sidoo kale xaqiijiyey in haddii xaaladdu sii socoto, kumannaan qoys oo ku nool gobolka ay wajahaan dib-u-dhacyo ama joojin ku timaadda kaararkooda EBT. Barnaamijka WIC-ga ayaa weli haya maalgelin ku filan dhowr toddobaad, balse haddii aysan dowladda dib u furmin, waxaa la filayaa in hay’adaha caafimaadka iyo bulshada ee bixiya cuntooyinka iyo caanaha ilmaha ay la kulmaan yaraanta sahayda.

Saameyn ballaaran oo ku soo fool leh bulshada Soomaalida

Bulshada Soomaalida ee ku nool Minnesota, gaar ahaan magaalooyinka Saint Cloud, Minneapolis iyo Rochester, ayaa kamid ah dadka ugu badan ee ka faa’iidaysta barnaamijyadan. Qoysas badan ayaa sheegay in haddii lacagahaas ay hakadaan, ay dhibaato weyn kala kulmi doonaan helitaanka cunto maalinle ah.

“Waxaan haynaa carruur aan iskuul u dirno, SNAP-ka iyo WIC-ga ayaana nagu caawinaya inaan cunto iyo caano helno,” ayay tiri Hooyo Nadiifo Mohamed oo ku nool Saint Cloud. “Haddii la joojiyo, waa dhibaato dhab ah oo aanan garaneyn sidaan u wajahno.”

Gunaanad

Haddii xasaradda siyaasadeed ee ka jirta Washington aysan degdegin, malaayiin qoys oo danyar ah oo ay ku jiraan kumannaan Soomaali-Amerikaan ah ayaa wajihi doona cabsi, cunno-yari, iyo cadaadis nafsi ah. Xaaladdan ayaa mar kale muujineysa sida uu xiritaanka dowladda u taaban karo nolosha dadka caadiga ah ee aan waxba galabsan.